Monday, December 7, 2009

ويمكرون ويمكر الله والله خير الماكرين



اخواني .. تفكيري ليس من النوع " الحجري " ، ولكنني فكرت بعقلي : )


----------


هنالك ستة أمور تدور في عقلي منذ مدة ، وإلى اللآن صراع التفكير دائم في عقلي ، فكيف نحلل أشياء شبيهة بأشياء قد حرمت ، وكيف نحلل أشياء قد غيرناها بأنفسنا !


قصه أصحاب السبت ، عندما حرم عليهم الصيد في يوم السبت ، قالوا لماذا لا نجمع الصيد في يوم السبت ، ولا نصطاده إلا بعد رحيل يوم السبت الذي حرم الصيد فيه !


فهكذا حللوا لأنفسهم شيء قد حرم عليهم ! .. ويمكرون ويمكر الله والله خير الماكرين






سأسرد الأمور التي كان تفكيري يتخاطفها في كثير من الأوقات


أولهما .. العباءه !


عندما نتكلم عن " الفاشن " والموضه ، نجد أن الفتيات حقًا ناقصات عقل ودين ، يتبعون ماهو حديث ، ناسين الكثير من الأشياء ، فلو خرجت اليوم إلى أحد المجمعات ، ستجد العجيب في أمر العباءة ، منهم المخصر والمهم الــ " المترتر بالشوارفسكي " ، ومنهم القصير والضيق ، ومنهم المنقش .. إلخ !


الآن يستوجب على العقل السؤال .. ما الحكمة من لبس العباءة ؟


ثانيهما .. النقاب !


" تكفه لا تطيح " ، إن تلك الكلمات ليست من أحاديث فلان مع علنتان ، وإنما هي إسم لأحد أنواع النقاب ، فلم يبقى شيء في هذا اليوم لم تتدخل فيه الموضة ، فبعض الفتيات يلبس نقابًا يجعل من عيناها فتنة !


فاستوجب العقل أن يسأل .. لماذا النقاب إذًا ؟ وما الحكمة من لبسه لدى البعض ؟


ثالثهما .. الحف باستخدام الاكسجين !


التلاعب بالحلال والحرام أمر أصبح سهل جدًا في زمننا الحاظر ، يقول صلى الله عليه وسلم " لعن الله النامصة والمتنمصة " ، وهذا لا يختلف فيه ، ولكن الذي اختلف فيه هو استخدام الاكسجين لتشقير الحاجب ، وجعله كالحف تمامًا


والآن يستوجب على العقل السؤال ، ما الحكمة من تحريم حف الحاجب لدى المرأه ؟


رابعهما .. الحجاب


لو ذهبت اليوم إلى أي مجمع أو اي مكان ، ستجد ألوان قوس قزح على رؤوس الكثيرات ، فالبعض يرتدي بنطال أصفر وحجاب اصفر ، " فاااااشن !!!! " ، ألوان لا تعد ولا تحصى ، وجميع تلك الألوان سبيل للفت النظر !


فلماذا شرع الله الحجاب ؟


خامسًا .. قواطي الروب


يقول النبي صلى الله عليه وسلم : ( ونساء كاسيات عاريات رؤوسهن كأسنمة البخت المائلة لا يدخلن الجنة ولا يجدن ريحها ، وإن ريحها ليوجد من مسيرة كذا وكذا (


فسبحان الله ، منذ اربعة عشر قرنًا كان الرسول يعلم بأنه سيأتي زمانًا ، تكون الموضة هي كل شي ء ! ، ولكن من يألمني حقًا ويشعل قلبي هو أن البعض غافل ، والبعض يصر ، لا يدخلن الجنة ولا يجدن ريحها






سادسًا .. الأغاني المتسترة


قبل فترة قال لي أحدهم إسمع هذه النشيده ، فعند سماعي لها ، أسمع خلف صوت المنشد ايقاعات و" دنابك " ، فقلت لصاحبي " تستهبل ؟ " .. استغرب وقال لي " شنو شفيك ؟ " ، رددت عليه " أشكره اغنية تقولي انشوده ؟ " ، ليقول لي هذا المنشد الفلاني شفيك ؟


حتى الأناشيد صارت تنشد " بالدنابك " !



12 التعليقات:

Anonymous said...

اخوي Kandroz اشكرك على هذه المقالة الرائعة

للاسف اليوم نجد الكثير يتلاعبون على احكام الدين

يجب علينا العمل روح الحكم وليس الحكم نفسة وان لا ننسى أن الاعمال بالنيات..


شكرا مرة اخرى على هذه الملاحظات الرائعة

نترقب المزيد منك ولكن مع ذكر حلول لهذه الظواهر ،واسنادات لما حرم وتم تحليله لهوى النفس


تقبل تحياتي

princess adadi said...

ماشالله عليك .. جان زين الشباب يفكرون نفسك

اسمح لي اعلق على كل نقطة

أولا : العباية
لما اسولف مع وحدة وتقولي " اي انا البس عباية " .. يكون عذرها .. " والله مالي خلق اشتري لي بدل كل يوم ".. مع انها احيانا تكون لابستها عشان اهلها او عشان التزامها .. بس تستحي تقول جدام الناس
فأقول لها : أصلا العباية أستر

مع اني ما البسها دوم .. بس على راسي البنت اللي تلبسها بغرض الستر ومن غير اغصاب من اهلها

ثانيا النقاب

استغفر الله .. كنت اسولف مع مجموعة بنات عن هالسالفة
في بنات الله يستر عليهم يستخدمونه لاغراض غير شريفة أبدا
تلبسه عشان تغطي ويهها واهي مواعدة :/
طبعا مو كلهم بس البعض منهم
ومنهم اللي يتفننون برسم العين
على قولة امي .. ماخذين النقاب عادة وليس عبادة

ثالثا : الحف والتشقير ( الاكسجين

تدري لو تمسك بنت وبنت وتقولها .. راح تلقاها تعرف الحكم الشرعي لهالشي
وحافظة حديث لعن الله النامصة والمتنمصة
الموضوع يبيله مجاهدة للنفس .. اي بنت اشوفها جذي اكون متأكدة ان تفكيرها مسيطر عليه حب المظهر
اللعن = الطرد من رحمة الله
شيدخلنا الجنة غير رحمة الله؟
شفايدة الصلاة والصيام والدعاء والذكر

رابعا الحجاب

صفة الحجاب الاسلامي : لا يصف ولا يشف
لو بس يحطون هالنقطة في بالهم جان احنا بخير


خامسا : قواطي الروب

ابي اعرف شنو الحلو فيها ؟؟؟
اشكره جدامي الشباب يمصخرون البنات .. وعادي عندهم
بالمحاظرة ما اقدر اشوف شي باللوحة بسبة راس اللي جدامي
وتلبس سكني ولبس ضيج وبعدين فجأة تلقى الراس متفوخ
على قولة بنت عمي جنهم حلاو مصاص
لا يدخلن الجنة ولا يجدن ريحها
في احد ما يبي ريحة الجنة
كل هذا عشان قوطي روب !!!

سادسا : الاغاني

صعب الواحد يترك الاغاني .. لان وين ما نروح نلقاها جدامنا
بسلما الواحد يبطل يسمع يحس انها فعلا شي تافه
وما منها فايدة ولا عايدة


بوستك خفيف يحمل الكثير بين كلماته

يعطيك العافية اخوي

اسأل الله الثبات لك ولنا ^^

بانتظار جديدك

سمو الأميرهـ ..ツ said...

السلآم عليكم ورحمة الله وبركااته ::

اممم ببدا فتعليقي :

***
العباة ..
أنا رايي من رايكـ
امم
تدري اول ما دخلت الجامعة
كان يقولون لي
الحين يبي لج تفصلين عبي للجامعه
قلت : وليش يعني ؟؟
جي شو الفرق بين عباة السوق وعباة الجامعه!!

امم

و أول ما دخلت الجامعه لقيت أشكال وأنواع
عبي أحسها(( بدل)) مب عبي
الله المستعاان
والله يثبتنا
****
"تكفه لا تطيح "
ظحكني الصرااحه
الله المستعان
****
الحف باستخدام الأكسجين
مع انه ما يخصني بس بقول رايي
اممم
قالوا إنه الحكمة من تحريم النمص
انه بإزالة شعر الحاجب
هالشي يظر الدماغ
فبالتالي استبدلوه
ب التشقير
***
الحجاااب حدث ولا حرررج
****
قوااطي الرووب
خخخخ انا وربيعاتي نسميهن بلوتوثات
الصراحه في جامعتنا ما لا عين رأت
أجزم إنه قواطي الروب اللي عندنا
أكبر قواطي في العالم
بكبره
وصار انهيار روبي
وامتد الارتفاع ليشمل الراس بكبره
هذي الموضة اللي طالعه عندنا
يعني من ورا قوطي روب عوود
ومن جدام
قوطي روب حجم متوسط
***

وو اسمح لي اخويه قرقرت واايد
و وو بس

تحيآآتي :)

جنون الصّمت said...

مؤسف بحق

العباءة ..

ازيدك من الشعر بيت
الحين هابين بالعباية الفسفورية !
تلقاها مخططة بألوان كفرات البلاك بيري ..
كيفها خلها تصير ماك جكن !

النقاب

لا تعليق .. " لاعت جبدي " بكل ما تعنيه الكلمة من معنى !
من المناظر اللطيفة اللي نشوفها
ماشاء الله منقبة !
بارك الله فيج

الاناشيد ..
بإختصار .. الاناشيد دخلت فيها الموسيقى لكن تغير المسمى إلى " ايقاع "

الله المستعان
هدانا المولى وغفر لنا
جزاكم المولى خير الجزاء اخي الكريم

Rawan said...

على اني البس عباءة سوداء تامة السواد
الا اني اوجهه النقد من الكثير
ليش ما تحطين شي بعباتج اي حركه تغيرين شويه ؟
ليش ماتلبسين بدل مع ان خواتج يلبسون؟
انتي معقدة ؟

مع ذلك صابرة
واكثر نقد يصادفني من اختي

--------------------

وبما ان حواجبي عريضه بعد اواجه نقد ليش مخليتهم جذي

بس والله الحمدالله عاجبيني جذي
----------------------

والنقاب
ناس ماخذته ستر من افعالها اللي تفشل

والله يهدينا ويهديهم

لولا الأمل said...

بهالوقت ياخوك اللي يفكر صار انسان حجري

واللي يقفل عقله ويصير امعة للموضه .. هو الانسان المتطور

العباية

ما يسوون جذي الا الناس المغصوبين على العباية من اهلهم

لأنهم لو يعرفون قيمتها جان احشموها :)

خل يسوون حركات فيها على راحتهم .. بس اهم شي تكون مو مبينه تفاصيل الجسم
> وجهة نظر


النقاب

يا اما تلبسه عن قناعة ولا لا تلبسه

انصدم لما اروح القهاوي اللي عالبحر واشوف منقبات يشيشون !

شحقه تشوهين النقاب ادام انتي مو قده !

صار النقاب ستر للعيوب الا ما رحم ربي :)


الحجاب

لا تعليق

قواطي الروب

اللي قلتوه كافي :)
-----

تصدق .. البنات الخليجيات عندنا هني مادرو عن هالسوالف

تييك البنت حتى مكياج مو حاطه .. بس تهتم انه يشكلها يكون مرتب

وهمها الوحيد هو الهدف اللي يت عشانه .. وهالنوع من البنات اللي اذا سألوك هذي خليجيه .. تقولها وانت رافع راسك .. اييييه

وفي بنات .. كائنات فضائية تمشي عالارض .. جسم عصل وصماخ مشفوط لي ورى

واييك واحد عربي يسألك .. هذي كويتيه ! فأنت تحاول تغير السالفة منعا للاحراج!

----

سالفة الاناشيد

موضوع في خلاف وفيه ادلة وااايد كثيره

كل شخص يحتمي ورا ادلته ..

البعض يحلل الموسيقى .. ليس الاغاني
والبعض يحرم الاناشيد المصحوبه بالايقاع
والبعض يحرم الاناشيد البته

يعني خلافات وايد

ما نقدر نحكم لأنا مو اهل للفتوى :)


بوست جميل .. تقبل مروري

Almaha said...

السلام عليكم...

أرى أن على كل مسلمة فهم ما يجب عليها القيام به...

أنت تطرقت لمحور واحد فقط في مقالتك. فتحدثت فيها عن الفتاة المسلمة العربية و تحديداً الخليجية و لم تتكلم عن الفتاة المسلمة بشكل عام...

مثلاً رأيت الكثير من الفتيات الملسمات اللواتي يلبسن الحجاب و لكنهم غير محتشمات في لبسهن. لا أعلم هل هم لا يفهمون ما الذي يقومون به أم يفهمن و لكن لا يبالين بما يقومون به...

في مرة من المرات سألتني فتاة ذات أصول أفريقية ممزوجة بدم أوروبي، لماذا أنتم (المسلمات) تلبسون الحجاب؟
فلا أراه مهماً لأن لي صديقة من الفئة الباكستانية ترتدي الحجاب عند خروجها من المدرسة و عند مجيئها تخرجه من على رأسها. و أظافت أيضاً بأن النقاب يزيد من جمال أعيننا. أجبتها ما الذي يلفت أنظارك عند رؤيتك للفتاة بشكل عام؟. فأجابتني شعرها، وجهها و مظهرها. فقلت لها فما بالك بالشباب ألا يعد الامر الآن مهماً.. و شرحت لها أهمية الحجاب و اللبس الفضاض...
رأيت الكثير من الاخطاء في الفتيات العربيات المسلمات و أرى الآن اخطاء المسلمات في الدول الغربية تتكرر واهمين أنفسهن بأنهم لا يفهمون و لا يعرفون العربية(القرآن)، كما فهمت منهن بأننا لا يجب علينا لومهم...

الاناشيد..
يقال بان المدمن على الأناشيد أو سامع الأناشيد بكثرة من الامور التي تلهي الإنسان من عبادة ربه و قرائته للقرآن.

إعتذار...
أرى بأنني أطلت في تعقيبي فلا أريد أن أقول سوى أن يهدي الله عباده الى الطريق الصحيح و أن يجعلنا من من يحب و يرضى

نبضُ الأدب said...

في البداية .. أشكر غيرتك على دينك

راح أعلق على نقطة وحدة بس
اللي اهي العباية..

أخييييه لعبوا بحسبتها لعب .. الله يهديهم =/
بما أني ألبس العباية .. لازم أكون حاطة جدام عيني وايد أشياء >> أولها .. لازم أعرف إني راح أكون تحت المجهر .. وخصوصاً من الناس اللي يحبون يتصيدون على الملتزمين .. لازم أكون حريصة إن ماتطلع مني أي حركة غلط .. عشان ما أعطي أحد مجال يقول : شوفوا الملتزمين .. مظهر بلا جوهر .. !ا

دايماً أردد بيني وبين نفسي >> عباتي .. سر أناقتي :pP
أحبها مثل ما اهي .. اخترعوها عشان الستر .. تقومين وتبدعين فيها وتشوهين
سمعتها ليش !؟

باجي النقاط كفيتوا و وفيتوا فيها .. شكراً لكم ..
وعسى الله يصلح الحال

فاطمــه said...

السلام عليكم

كلامك عدل واتفق معاك 100 %

معروف
أن

الحلال بين والحرام بين

وما يحدث الآن هو مجرد خلط بين الاثنان
بدعوى انه يجوز ومسموح وليس فيه ضرر

لكن هل صحيح

كل من تلبس عبايه متدينه لأ ليس بالضرورة الأغلبيه اجبار من اهل او زوج
وهل بالضرورة من تلبس النقاب هي متدينه ايضا ليس بالضرورة

وهكذا

الان في هذا الزمن اختطلت المفاهيم
ولم يعد الشكل هو ما يدل على مدى الاهتمام بالدين
فقد تجد واحده غير متحجبه اخلاقها افضل من واحده متحجبه وترتدي العباءه والعكس صحيح
ليس بالضرورة

الذي نراه هو ما يدل على الشخص
خصوصا اللبس لا يدل على مدى علاقة الشخص بدينه

يعطيك العافيه

فاطمــه said...

أي =p

هذي انا مره ثانيه

حبيت اشكرك لأنك رديت على سؤالي ذيج المره تبي الصج
انا مو قصدي اقولها بهالاندفاعيه انه ليش مضايق وليش تبا يا غربه

اذا انته اكيد مختار هالشي بنفسك واكيد محد جبرك على هالشي

لكني الحين فهمت قصدك
وابيك تفهم قصدي

أنا أول ما تخرجت من الثانويه

نسبتي نا دخلتني طب وكنت غصب طيب ابي طب
يعني ماكو لا تحاولون مابي شي ثاني

واخوي وماما اقتنعوا اني ادرس برا
وكان عادي عندي وانا نوعي احب هالسوالف واحب الاعتماد على النفس بشكل كبيييييييييييييييييييييير


صج بشتاق لاهلي وجذيه بس هم عادي فرصه يديده وحياه يديده

لكن بابا ما وافق والحين الحمدلله انا في خيره في كليه العلوم الاداريه وشاده حيلي وفي شغله وحده مارح اتنازل عنها لو شنو
راح اروح اكمل برا ماستر و بي اتش دي رغم الغربه

ورغم كلشي

لو تفكر فيها صج

يمكن اكيد نشتاق حق وطن حق بيت حق
يمعه أهل
لكن ترى وسائل الاتصال يا شكثرها الحين

ما بقى فيس بوك ومسنجر وكاميرا ماسنجر والح

وغير انه اهلك يقدرون يزورونك
واهم شي شعورك انك تكون نفسك بنفسك

في هالعمر الي يتحدد فيه الشخصيه


اتمنى تكون فهمت وجهه نظري

يعطيك العافيه وبالتوفيق دائما

خلك متميز

=)

عبد الرحمن said...

السلامــ عليكمــ ورحمهــ الله وبركاتهــ

احب اشكرك على هذه المقاله التي تحمل في مضمونها الكثير من الامور التي يخجل الشخص من ذكرها.

للاسف يا اخي العزيز كل الكلام الي قلته صحيح
والله شي يحز بالنفس يوم تشوف مجتمعاتنا العربيه يملؤها هذا التخلف والتفكير السطحي بعد ان كان العرب هم من يضرب بهم المثل برجاحت العقل.

احنا بناتنا وحتى البعض من شبابنا للاسف فيهم ميزه جايسه وهي يلا شو الموضه وياها >>على قوله المثل : مع الخير يالشقره.

لا وجان زين شقره تلقاها جيكره مع احترامي حق الكل تبي تبرز نفسها ما تدري شلون فتلجأ حق هالامور ..

تلبس ضيق وتحط قوطي روب لا وتستانس لمن احد يطنز عليها المهم عندها انها الفتت انتباه الناس وصارت محور حديث...لا وبعضهم يتعمدون يسوون مثل هالاشياء عشان تسهل على الشباب عمليه المقازل....
في نقطه عندي ودي اقولها ومن زمان باطه جبدي اهي مرتبطه بالحجاب....
انا انقهر لما اشوف وحده لابسه حجاب بس شنو مو اي حجاب الحجاب الي اييك على اخر راسها والقدله مقطيه عينها >>مضله مو قدله<< انزين دام انج تبين تلبسين حجاب يا تلبسينه عدل ولا لا تلبسين عشان لا تشوهين سمعه المتحجبات.

والنقاب وما ادراكما النقاب..

الصراحه يعجز اللسان عن وصف اللي قام نشوفه من المنقبات والله شي يحز بالخاطر يوم تشوف بنات ديرتك جذي يسوون..

للاسف الحين النقاب بدل من ان يكون من اجل التستر والعباده..

اصبح يستخدم لامور تشوه من سمعه المنقبات

فكثير من المنقبات الزائفات(انا ما ابي اجمع لان كثير من المنقبات ما شاء الله عليهم ملتزمات وصالحات كأنهم النجوم التي يصعب على الشخص الوصول اليهم, الله يثبتهم ويبعد عنهم الفتنه)
يستخدمون النقاب لعده امور, منها انها تستخدمه عشان تبرز جمال عينها, والاخرى تقول والله انا اليوم مالي خلق احط مكياج فألبس نقاب عشان محد يشوفني(مسكينه ما تبي تخرع الاوادم من ويها) , وفي جزء من البنات اهلهم يقصبونهم انهم يلبسون النقاب , وفي جزء ثاني يلبسون النقاب بس جزي عشان تبين حق اهلها انها محترمه واهي من وراهم قام تشوه سمعتهم, واكثر جزء يبط الجبد الي تلبس النقاب يوم تكون مواعده (الاخت ما تبي احد يشوفها)دام انج تدرين انج قام تسوين غلط وما تبين احد يشوفج ليش تسوينه من الاول.

بنات التجاري...هيييييه وما ادراكما بنات التجاري...

شفت كل الملاحظات التي كلتها انت..

كلها راح تلقاها هناك!

بس ما اقول الا الله يستر على الكل..

ويهديهم ويهينا الى السراط المستقيم..
والله يثبتك ويثبتنا على طاعته..اللهم امن.
ادري اني طولت عليك بكلامي والله عندي وايد كلام ابي اقوله بس ادري ماراح اخلص..

عساك دوم عالقوه انشاء الله

ولكـــ منيـــ احلى تحيه

في امان الله ورعايته

SCRIBBLE ..♥ said...

وكأن الستر اصبح يتبع الموضه كيفما كانت !

الله يرزقنا الحق واتباعه

بارك الله فيك

ووفقك لما يحب ويرضى

تقبـل مروري